Aurten, guztira, 30 argazki bidali dituzte eskoriatzarrek nahiz inguruko herrietako lagunek. Inkernu tabernan aurkeztu dira irudi guztiak. Ohikoa den moduan, mundu osoko txokoak aurki daitezke. Antolatzaileek jakinarazi dutenez, Txinakoak, Txekiakoak eta Tenerifekoak daude horien artean. Gaia librea bazen ere, udako oporrekin lotutako irudiak jaso dituztela aipatu dute.
Saria ez da aldatu: Gatza-gain jatetxean bazkaria irabaziko du zozketatik garaile irteten den irudiaren jabeak. Aurkeztutako postal guztiekin, gainera, erakusketa egingo dute Inkernun. Hilabete inguru emango dute han, ikusi nahi dituztenendako. Bosgarren aldia da kultura elkarteak posta lehiaketa antolatzen duena.
Urteurrena
Bestalde, gogorarazi dute tabernak abenduan bost urte beteko duela eta dagoeneko urteurrena ospatzeko ekimena antolatzen dihardutela. Aurreratu dute CD bilduma prestatzen ari direla.