Tumulu horien gaineko informazioa zabaltzeko eta hilobi-elementuak non kokatuta dauden azaltzeko seinale handi bat jarri dute Bolibar eta Eraña arteko bidegurutzean, errepide izkinan.
Tumuluen gaineko triptikoak
Horrez gain, Turismo eta Ondare Sailak tumuluen gaineko triptikoak argitaratu ditu. Horietan Erañan dauden Puntiaga, Asuntzeta mendebaldeko eta Asuntzeta ekialdeko tumuluen gaineko informazioa eta airez egindako argazki-mapa batu dituzte. Ibarraundi museoan, udaletxean bertan eta inguruetako hainbat ostalaritza negoziotan banatu dituzte triptikoak.
Zubiateko labea konpontzen
Bestalde, udaletik jakinarazi digute Zubiateko labea aldamioz inguratuta dagoela, eta Arantzadikoek hartu dutela lanen ardura. Helburua da labea barrutik eta kanpotik berreskuratzea. Horretarako, apurtuta dauden zatiak konpontzen eta harria garbitzen dihardute, besteak beste.
Lan horiek hilabete eta erdiko iraupena izango dute. Labea XIX. mendeko erdialdetik XX. mendera artera egon zen lanean, eta historialarien esanetan garrantzitsua da. Udalaren asmoa da labearen inguruan zeramikaren gaineko museo-proiektua lantzea.
Leintzeko ikus-entzunezkoa
Ondarearen alorrarekin jarraituta, Sormen enpresak, Udalaren enkarguz, Leintz ibarreko historiaren gaineko ikus-entzunezkoa egiten dihardu. Irudiz eta soinuz osatutako dokumentu horretan Leintz ibarreko Erdi Arotik gaur egunera arteko historia laburtuko dute. Horretarako, hainbat historialarik gidoia idatzi dute: Aitor Antxiak, Iñaki Urretak, Bea Akizuk eta Isabel Guridik, besteak beste.
Ekaineko lehenengo astean aurkeztuko dute, eta Ibarraundin jarriko dute betirako. Baliabide oso modernoak izango ditu, eta ikusle guztiendako egingo dute: ikasleendako, historia zaleendako eta baita turistendako ere.