Olazar erretiratuen elkarteko zuzendaritzan aldaketak daude

Olazar erretiratuen elkarteak batzar nagusia egin zuen egubakoitzean, hilak 23. Horretan joan den urteko kontuen balantzea egin zuten eta aurtengo aurreikuspenen berri eman zuten. Horrekin batera, zuzendaritzan egongo diren aldaketen berri eman zuten.

Pedro Mari Armendariz presidenteak, Felisa Oruna idazkariak, Pedro Altuna diruzainak, Esther Alegria sukaldeko bokalak eta Emiliano Royo bokalak kargua utziko dute.

Horren ordez honako hauek sartuko dira: Maximo Iñurrategi, Inazio Oion, Roberto Kortazar, Hanfri Martina, Emilita Gartzia, Rosarito Zubizarreta, Maria Isabel Isasmendi eta Ana Serrano. Bakoitzak izango duen postua zehazteke dago.

Gastuak eta diru sarrerak

Guztira, 15.152,18 euro gastatu zituzten. Tai-Chi ikastaroa eta Iratxera eta sagardotegira egindako irteerak izan ziren gehien  balio zutenak. Lehengoak 3.920 euro eta irteera bakoitzak 3.000 euro inguru. Esan beharra dago, horren harira, bidaiak ez direla esandako gastu horietan sartzen.

Diru sarrerei dagokionez, 14.640 eurokoak izan ziren. Udalak, esaterako, 3.000 euroko dirulaguntza eman zuen eta bazkideen kuotan 3.840 euro jaso zituen elkarteak.

Aurtengo aurreikuspenak

Aurtengo aurrekontua14.834 eurokoa da. Joan den urtean bezala, apirila edo maiatza aldean sagardotegira joateko asmoa dute eta azaroan, Iratxera. San Pedroko jaietan, urteroko merienda eta uztailan 80 urtetik gorakoendako omenaldia egitea aurreikusi dute Olazarrekoek. Azken horretarako, esaterako, 1.053 euro gorde dira. Horretaz aparte, bestelako ekimenak antolatuko dituzte.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.