Eskoriatzan, atzeko aldetik sartu da mendi zatia Aranburuzabala kaleko etxe barrura, "logelako leihoa puskatuta", xehetasunen arabera.
Zorionez, ez da zauriturik izan, baina hori bai, hiru ataritako bizilagunak etxetik atera dituzte: "24 etxebizitzetako bizilagunak aterarazi egin ditugu, badaezpada, eta horietako batzuk, seguru aski, gaur ezin izango dira bueltatu", jakinarazi dute Herrizaingo Sailetik.
Edozelan ere, goizegi da aurreikuspen seguruak egiteko, oraintxe bertan adituak daude Aranburuzabala kalean, egoera aztertzen: "Aparejadoreak, udal teknikariak… daude han, egoera baloratu behar dute-eta, lehenengo". Suhiltzaileak, Ertzaintza eta beste ere hantxe daude une honetan (10:00).
Eskoriatzakoa ez da, baina, inguruan gertatu den lurjausi bakarra izan. Atzo (zapatua) iluntzean, Cuatrovientos baserrirako bide zatia behera etorri zen, "Untzillako bidea baino apurtxo bat aurrerago", lekukoek esandakoaren arabera. "Gu 17:00ak inguruan pasatu ginen handik, eta ondo zegoen. 18:00etatik 18:30ak inguruan gertatu zen", gaineratu dute.
Orain, Arrasatetik Aramaiorako bidea itxita dago, eta badirudi egoera horrek luze joko duela, gainera. Herrizaingo Sa¡letik esandakoaren arabera, lurjausi ugari gertatu dira bart eta gaur EAEko hainbat puntutan, eta horietako batzuek Aramaiokoak baino lehentasun handiagoa dutela-eta, horiek garbitu beharko dituzte lehenengo. Beraz, Aramaiotik Arrasate ingurua jaisteko, auzoetako errepideak erabili behar dira, edo Aretxabaletara jaitsi.