Mario Diazen kontzertua bertan behera

Ezusteko handiak gertatu ziren atzo (zapatua) Eskoriatzan. Ezustekoetako bat egubakoitzean hasi zen, Chambaoko La Marik Azkoaga Enea hotelean kontzertua egingo zuela zabaldu zenean. Zapatuan konfirmatu zuten notizia: Mario Diaz musikariarekin batera kontzertua egin behar zuen, Diaz disko berria aurkezten zebilen-eta, hari laguntzen. Musika zaleei, baina, interesatzen zitzaiena zen Chambaoko La Mari zetorrela. Eta azkenean gertatu zen ezustekorik handiena: ez Mario Diazek eta ezta La Marik ere, ez zuten batek ere abestu Eskoriatzan.

Lekukoek esandakoaren arabera, Mario Diaz minduta sentitu zen ikusi zuenean Eskoriatzan eta inguruan Chambaoko La Mari ikusteko zain zeudela. La Mari Diazen neskalaguna da eta kontzertuaren helburua zen Mario Diazen Gloria Bendita diskoa aurkeztea, La Marik kolaborazio txikiak eginaz.

La Mariren esperoan

Kontrakoa ikusi zuen, baina, Diazek: guztiak zeuden La Mariren zain eta pentsatzen kontzertua neskalagunarena zela. Hori ikusita erabaki zuen kontzertua bertan behera uztea.

Jende mordoa joan zen Azkoaga Enea hotelera kontzertu horren zain, eta askok pentsatuta La Mariren kontzertua zela, ez zuten oso gustura hartu kontzertua bertan behera uztea.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.