Antolatzaileek jakinarazi dute modu horretan jaia "herriari" eta, hortaz, "eskoriatzar guztiei" zabaldu gura dietela. Goiz osoan zehar, beste askoren artean, etxeko txikienendako tailerrak, jolasak, antzerkia, ping-pong txapelketa eta arku-tiroketa egongo dira plazan.
Bazkaria eta aparraren festa
Eguerdian eskolako patiora itzuliko da jaialdia. 14:00 aldera, herri bazkaria egongo da han. Guztira, 110 lagun inguru elkartuko dira aurten. Bazkaldu ostean, berriz, aparraren festarekin ederto pasatzeko aukera izango dute umeek. Horren harira, antolatzaileek gomendatu dute bainujantzia eta txankletak eroatea. Ekimen hori 16:00etan hasiko dela aurreikusi dute.
Luis Ezeizaren jaialdia ez da horrekin amaituko. Ordubete geroago, 17:00etan, dantzaldia egongo da. Bakoitzak dantza egiterakoan duen trebetasuna erakutsiko du orduan.