Joan den urtean 45 bat lan jaso zituzten, ibarrekoak eta baita kanpokoak ere. Aukeratutako irudia Iñigo Urrutia eskoriatzarrak egin zuen, eta irudi horrekin 1.000 orri-puntu egin zituzten banatzeko. Hala, Udalak eta Bibliotekako arduradunek ekimena errepikatzea erabaki dute. Edozeinek esku hartu ahal izango du, berdin da eskoriatzarra den ala ez; eta teknika eta gaia libreak izango dira. Hori bai, lanaren neurria 21 x 5,50 zentimetrokoa izan beharko da.
Irabazlearendako 300 euro
Orri-puntuak egilearen izen barik aurkeztu beharko dira, atzeko aldean lelo bat dutela; horrekin batera, gutunazal itxi batean lelo bera eta egilearen datuak jarri beharko dira.
Irabazleak 300 euro jasoko ditu, eta lanak aurkezteko azkeneko eguna abenduaren 15a izango da.
Hortaz, 2009ko orri-puntuek irudi berria izango dute alde batean; eta bibliotekaren egutegia eta harremanetan jartzeko telefonoa eta e-posta helbidea bestean. 1.200 ale kaleratzeko asmoa daukate.