“Subordinazioaren kontra” edo “Kultura eta identitate erbesteratuak” bezalako liburuen egilea da Imanol Galfarsoro. Aretxabaletarra, soziologoa, eta idazlea, Ingalaterran bizi da, eta bertatik, ikuspuntu ezkertiar abertzale batetik, askapen nazionalaren aldeko borroka euskal gizarteko elementu askatzaile funtsezkoenetakotzat du bere liburuetan.
HUHEZIn, baina, euskal kulturgintzaren transmisioa oinarri, 60 eta 70eko hamarkadetan kultura nola sentitzen zen eta ordutik gaur egunera kultur pentsamenduari dagokionean izan diren aldaketak aurkeztu zituen, betiere ikuspuntu pertsonal batetik.
Erresistentzia ekintza bezala ulertzen zena, gerora, eta hainbat arrazoi medio, kultur aniztasunaren eta multikulturalismoaren oinarri bezala kontsideratu edo ulertu direla dio Galfarsorok. Euskal kultura ulertzeko modua aldatu egin dela gizartean, eta erresistentzia politikoaren zentzua galdu dela uste du, kultur aniztasunari eta euskara kultur ondare soil bezala ulertzeari tokia utziz.
Aldaketa horien arrazoien edo zergatien gainean jardun zuten gero ikasleek Galfarsororekin, bakoitzak bere ekarpenak eginaz, eta hasiera batetan behintzat ikasleek onartu egin zuten Galfarsororen tesiaren haritik.
Orain arte aurkeztutako tesiaren kontra, baina, Galfarsorok, orain, eta berriz ere, kulturaren politizazioa gertatzen ari dela uste du, eta beharrezkotzat jotzen du gainera.
Ez dago beraz, bi gauzak bereizterik, Galfarsororen hitzetan. Haren ustez, ez du-eta zentzurik, euskaltzalea zarela esan eta politikaz ezer jakin gura ez izateak.