Azken hamarkadetako pop-rock euskaldunean ahaztu eziniko musikaria da Jimmy Arrabit. Besteak beste, Itoiz, Anje Duhalde, Juan Carlos Perez, King Mafrundi, Labrit, Imuntzo eta Beloki eta Sustraia taldeetan ibilia da. Orain, Jimmy Arrabit Trio taldearen lana aurkeztu berri du, Fred Feugas (pianoa) eta Xabi Hayetekin (kontrabaxua) batera. Arrabitek bateria jotzen du. Jimmy Arrabit Trio taldeak musika pertsonala proposatuko die gaur gauean Inkernura joaten direnei: afro-beat erritmoen artean,Euskal Herriko betidaniko melodiei jazz eta elektro-dub eraginak lotuko dizkie.
Petti
Petti abeslari eta gitarra-jole nafarra ere Eskoriatzan izango da. Estiloari dagokionez, rock, folk-rock, post-rock eta minimalismoan sailkatu ohi dute Berako musikaria. Kaleratu dituen bost diskoen kantuak eskainiko ditu; bereziki, joan den urtean argitaratutako Awañak izeneko lanean daudenak.
Inkernuren 6. urteurrena
Bestalde, abenduaren 6an, Inkernu tabernak sei urte beteko ditu, eta, hori dela-eta, Aitzorrotz kultura elkartekoak jaialdia prestatzen hasi dira. Egun horretan Esmolem l’Eina talde kataluniarrak kontzertua eskainiko du han, 22:30ean.