Arau-hauste edo isunen kopuruak igotzea ere erabaki du, era berean, udalbatzak. Hala, arau-hauste arinak 50 eurorekin zigortuko dira (lehen, 30); larriak, 200 eurorekin (lehen, 100); eta oso larriak, 500 euroko isunarekin (lehen, 301 euro).
Horrez gain, elbarrien erabilera esklusiborako seinaleztatutako tokietan baimen barik aparkatzea orain arte arau-hauste arina zen, baina aurrerantzean arau-hauste larria izango da, eta, hortaz, demandatuak 200 euro ordaindu beharko ditu; eta, hamabost eguneko epean ordainduz gero, 60 eurorekin zigortua izango da.
Bestalde, isun arina izaten jarraitzen du autoa uztea bi noranzko kaleetan, ibilgailuen zirkulaziorako errei batean; baimendutako ordutegiaren barruan zama-lanak egiteko guneetan; espaloien gainean eta pasealekuetan, kontrakoa dioen seinaleztapenik ez dagoenean; bigarren ilaran; zabor edukiontziak oztopatzen diren tokietan; eta behar bezala seinaleztatuta eta mugatuta dauden garraio publikoaren geltokietan.
Irailaren 30era arte
Horiek horrela, zirkulazioaren udal ordenantzan udalbatzak egindako aldaketen gaineko erabakia jendaurrean dago, Udaltzaingoaren bulegoan, nahi duenak aztertu eta egoki iritzitako erreklamazio edo iradokizunak aurkez ditzan; irailaren 30era arte aurkez daitezke erreklamazioak.