"Denboraldi gogorra izan da. Apirilean hasi ginen Euskadiko mendiko bizikletako txapelketako lasterketekin, eta joan den astean izan genuen azkeneko lasterketa. Baina, Euskadiko txapeldunaren maillota lortu izanak merezi izan du egindako esfortzua".
Eskoriatzako gaztea Dorletako Ama Txirrindularitza talde barruan dagoen Lizarralde kirolak taldeko kide da, eta kadete eta gazte mailako lasterketetan ordezkaritza zabala dute. Bere kategorian, baina, Eskoriatzakoa nabarmendu da –Alex Aranburuk ere urte oso txukuna egin du, eta hura ere Euskadiko selekzioarekin izan zen Katalunian–.
Eskibel ez da podiumeko lehenengo postura gehien igo den ziklista izan, hor lehiakide gogorra izan du, Jonathan Lastra, baina Eskoriatzakoaren erregulartasunak saria izan du, proba ia guztietan podiumean egon delako: "Bastidako lasterketan baino ez dut irabazi, baina gainontzeko ia guztietan podiumean izan naiz. Beno, Muskizen bosgarren izan nintzen, baina hor, elite mailako ziklista batek konturatu barik zirkuituko zinta bizikletarekin eraman eta atzetik bigarren postuagatik lehian genbiltzan bi ziklista galdu egin ginen. Hori bai, Lastra dagoen tokian ez daukat zereginik, beste maila batean dagoen ziklista delako. Saiatu izan naiz haren atzetik joaten, baina, itzuli bat egin orduko atzean uzten nau".
Mendiko bizikletarekin kadete mailako txapeldun izanda, Eskoriatzakoak argi du errepideko bizikletari lehentasuna eman nahi diola: "Datorren urtean gazte mailan izango naiz, eta errepidea eta mendia batera egin nahi ditut, baina aurrerago errepidera mugatuko naiz". Hori bai, Eskibelek bizikleta gaineko beste modalitate bat probatu nahi du, ziklokrosa: "Geroago eta jende gehiago dabil hor, eta denboraldia prestatzeko ezin hobeto etortzen da ziklokrosa egitea. Baina, hor ere bi bizikleta behar dira, eta...".