Elkarte horretako Juan Ramon Garaik azaldu zuen 1936an zazpi eskoriatzar desagertu zirela, guztiak zibilak; eta haien gaineko salaketa egiteko Udalaren babesa eta laguntza ekonomikoa behar dutela.
Martutenetik askatu ostean, desagertu zirenak honako hauek dira: Emeteria Aranburuzabala Beitia, Apolinar Uribe Urteaga, Tomas Zubizarreta, Francisco Viteri, Teodoro Errazti Izurrategi eta Jorge Iturricastillo Aranzabal. Gainera, horiez gain, Luziano Arkauz Iturbe Eskoriatzan bertan desagertu zen.
Herriko zazpi seme-alaba
Gerran desagertutako zazpi zibil horien gaineko salaketak eta epaiketak egin ahal izateko, elkarteak gura du horien senideak aurkitu eta notarioen aurrean salaketa egin. Garaik azaldu zuen notarioen aurrean deklaratzeko pertsonako 200 euro behar direla.
Udalbatzak erabaki zuen elkartearen mozioa babestea, PSE-EEko taldeko ordezkaria mozioko puntu batzuetan abstenitu zen arren. Eta, are gehiago, onartu zuten 2009ko udal aurrekontuetan partida bat zabaltzea, elkarteari helburu horretarako diruz laguntzeko. Dena dela, alkateak azpimarratu zuen udalaren egoera ekonomikoa ez dela ona, eta partida horretarako kopuruak zehazten joango direla.