Gurasoendako euskara ikastaroak hasi dira

Hasi da aurten ere Bidelagun programa, seme-alabekin euskaraz jolas egin eta eskolako lanekin lagundu gura dieten gurasoendako ikastaro sorta. Udalak, Leintz Euskaltegiarekin, eta herriko ikastetxeek antolatu dute. Gainera, aurten, lehenengo aldiz, Aretxabaletara ere zabaldu dute eskaintza.

Eskoriatzan, bi talde sortu dira, bat hasiberriendako eta bestea hobetu gura dutenendako. Hasiberriendako ikastaroa 50 ordukoa da, Aste Santura arte, eta astean hiru ordu egingo dituzte, ipuinak, abestiak eta antzekoak ikasten. Horretarako, batik bat, umeek eurek eskolan erabiltzen duten materiala erabiliko dute, eurendako egokituta.

Beste taldea, sakondu gura dutenena, Gabonak arte batuko da, eta, denetara, 20 ordu emango dituzte bakarrik, guraso horiek premia txikiagoa dutelako. Euskaraz egiterakoan ohiko akatsak zuzentzen, ahozko jarduna hobetzen eta eskolako hiztegia ikasiko dituzte, besteak beste. Aretxabaletan osatu den taldea ere maila horretakoa da. Euskaltegiko materiala erabiliko dute, euren mailara egokituta, betiere.

Aurten, 27 aita-ama

Iaz, 19 guraso ibili ziren eskola horietan; aurten, hirugarren urtez antolatu dute, hain zuzen, guraso askok jarraitzea eskatu zutelako.
Aurten, denetara, 27 aita-amak eman dute izena; horietatik zortzi sakontze mailako taldean daude, Eskoriatzan; zazpi, hasiera mailakoan, Eskoriatzan; eta hamabi, berriz, Aretxabaletako taldean, hasiberrien mailakoa hori ere. Gehienak 30-35 urte bitartekoak dira, eta Lehen Hezkuntzako umeen aita-amak. Izenematea Eskoriatzako eta Aretxabaletako ikastetxeen bitartez egin dute.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.