Ohitura onak ez dira inoiz galdu behar. Horixe pentsatuko zuten atzo, domeka, eskoriatzar askok, Atxorrotzeko ingurunera apurka eramaten duten aldapak igotzen zituzten bitartean. Eguraldia lagun zutela, 09:30ean herria atzean utzi eta igoerari ekin zioten. Gehienak mendiko bota egokiak jantzi eta makila eskuan zutela, oinez igo ziren; asko, bizkarrean ume txikiak zituztela. Baina, urtero bezala, zaldi eta asto gainean nahiz bizikletan igo zen bakarren bat ere egon zen.
Mendi tontorrera iristean, batzuek meza entzuten zuten bitartean, besteek hamarretako gozoa dastatu zuten; bokata ederra Errioxako ardoaz edo sagardoaz lagunduta. Etxeko txikienek, bitartean, nahiago izan zuten ondoan zeuden kobazulo txikian bueltaka ibiltzea edo zaldi eta asto gainean igotzea. Jarraian, musikaren txanda iritsi zen. Aurten, Jainaga eta Narbaiza bikotea arduratu zen giroa alaitzeaz. Lortu zuten gura zutena. Bakar batzuk dantza egitera animatu ziren-eta.
13:00etan gehienak behera
Goiza Atxorrotzen pasa ostean, 13:00ak inguruan, herrira bueltatzen hasi ziren familia gehienak. Koadrila batzuk, baina, han bazkaldu zuten. Lehenago edo beranduago, baina, kontua da 18:30era herriko plazan egon beharra zegoela, herritarrek egindako tortillak jateko eta txistularien erromerian parte hartzeko.
Argazkiak
Eskoriatzako udaleko Flickr kontuan dituzue atzoko argazkiak.
ALBISTEAK ESKUKO TELEFONOAN
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Bidali ALTA 688 69 00 07 telefono zenbakira –Whatsapp bidez–.
TELEGRAM: Batu zaitez @GoienaAlbisteak kanalera.
ASTEBURUETAKO BULETINA
Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.
Harpidetza aukera guztiak
