Dokumentala Asociación Cultural Mórrimeren bi urtetako lan gogorraren emaitza da. Extremadurako errepresio frankistari buruzkoa da; 1936ko irailean, Francoren soldaduek Portugaleko muga ondoko azken herriak konkistatzen dituztenekoa, hain zuzen.
Errepresioa han ikaragarria zenez, ehunka lagunek muga igarotzea erabaki zuten eta Portugalerantz ihes egin zuten. Antonio Augusto de Seixas portugaldar tenientearen esku-hartze gizatiarrari esker, Barrancos herri ondoan errefuxiatu-esparru bi sortu ziren espainiar talde hori hartu eta babesteko.
Lekukoak
Dokumentalean Portugaleko eta Espainiako lekukoek, historiagileek, kazetariek eta idazleek parte hartu dute. Guztira 18 pertsona azaltzen dira, horietatik nabarmentzekoak gertaeren hamar lekuko zuzen.