Sarrerako atean hasten da dena. Giltza tradizionalaren ordez txartela dugu. Txartela sentsore aurretik pasatzea nahikoa da atea erabat zabaltzeko. Sistema honek une oro daki nor sartu den etxean, eta ze ordutan.
Neurrian kontsumitu
Behin barruan gaudela, sistemak ongi-etorria emango digu argiekin. Etxe barruan dagoen pertsona kopuruaren arabera, eta leihoetatik sartzen den argiaren arabera, parametro horiekin bat datorren intentsitatearekin piztuko dira lanparak. Horrela, neurrian kontsumituko dugu.
Segurtasuna
Konforta, segurtasuna eta elbarrituendako abantailak ematen ditu etxe domotiko batek. Iturri bat irekita utzi badugu, adibidez, ordenagailuak hori detektatu eta uraren balbula orokorra ixten du. Gainera, gure mugikorrera mezu bat bidaliko digu gertatutakoaren berri emanez. Segurtasun mota hau egokia da, besteak beste, pertsona nagusiendako.
Bestalde, argiaren arabera pertsianak eta toldoa igo eta jaitsi ditzake, kanpoan oporretan gauden bitartean norbait etxean dagoenaren sentsazioa emanez.
Domotika: gero eta indar handiagoa
Setaldeko domotikako arduradun Raul Jimenezek adierazi du zentro honetan erakutsitako guztia dagoeneko etxebizitzetan, hoteletan eta bulegoetan jartzen ari direla.
Setalde enpresa gipuzkoarra orain dela 27 urte hasi zen lanean. Gero eta indar handiagoarekin dabil sartzen domotika gure etxeetan; Europako beste herrialde batzuetan, adibidez, oso ohikoa da horrelako sistemak izatea etxean.