Ospakizunak ohikoak izango dira. Hala, 09:00etan, txistulariek herriko kaleak girotuko dituzte eta ordu erdi geroago, 09:30ean, Atxorrotzera igotzen hasiko dira eskoriatzarrak.
Behin goian daudela, meza entzuteko aukera izango dute gura dutenek; 11:00etan emango diote hasiera horri.
Jarraian, Jainaga eta Narbaiza trikitilariek Sorkunde eta Jon bikoteak utzitako lekua hartuko dute, azken urteotan esandako bikotea arduratu da-eta ingurunea alaitzeaz. Dantzaldiak irauten duen bitartean, Atxorrotzeko tabernan ogitartekoak eta kafea egongo dira salgai bazkaltzen geratu gura dutenendako.
Herriko plazan
Bazkaldu ostean, herrira bueltatzeko ordua iritsiko da, hurrengo hitzorduak Herriko Plazan egitea dago-eta aurreikusita. Betiko moduan, 18:30ean, herritarrek egindako tortilla goxoak salduko dira han. Ordu berean, gainera, Eskoriatzako txistulariekin erromeria hasiko da.
Jakina denez, Atxorrotz Egunean batzen den diru kopurua Eskoriatzako Atzeratuen Taldeari eta Atxorrotx GKEak dituen proiektuei laguntzeko bideratuko da. Antolatzaileek parte hartzeko gonbita egingo dute. Huts egiteko aitzakiarik ez dago, eguraldia ere portatuko dela iragarri dute-eta.