Eskoriatzako kaleetan jarriko dituzte edukiontziak; herritarrek etxeko olioa ontzietan batu eta edukiontzietara eraman beharko dute. Hilabete barru jarriko dituzte edukiontziak.
Arrasatekoaren antzerakoa
Eskoriatzan jarriko duten sistema Arrasaten dagoen sistemaren oso antzerakoa da. "Arrasatekoak pote berezi bat behar du. Oso antzerako sistema izango da, baina ez dauka zertan pote berezia izan behar, etxean dugun edozein potek balioko digu", azaldu du Pedro Lasagabaster Eskoriatzako alkateak eta Mankomunitateko ingurumen arduradunak. Berezitasun horregatik, hain zuzen, izango da esperientzia aitzindaria. Plastikozko zein kristalezko poteak erabiltzeko aukera egongo dela gaineratu digu.
Informazioa banatuko dute
Edukiontziak jarri bitartean, informazio banatuko dute Eskoriatzan. Horren harira, Mikel Jaio Mankomunitateko ingurumen teknikariak azaldu digu inbutuak banatuko dituztela; guztira, 2.000. Eskoriatzako etxe bakoitzean inbutu bat hartzeko aukera egongo da. "Inbutua prestatuta dago ur botila edo freskagarri botiletarako. Uztai bidez inbutua botilara lotzen da; modu horretan, olioa arazo barik pasa daiteke zartaginetik ontzira", azaldu digu Jaiok. Sistema honekin, gainera, etxeko ontziak berrerabiltzeko aukera dago.
Bi dira esperientzia honen helburuak: batetik erabilitako olioa sukaldeko arraskatik behera botatzea ekidin gura da; eta, bestetik, olioa birziklatu gura da. "Arraskatik botatzen duguna errekara doa zuzenean, eta horrek asko kutsatzen du. Araztegiak dauden tokietan, ura garbitu egiten da baina olioa hondakin bihurtzen da", dio Jaiok.
Biodiesela egingo dute
Ecogras enpresak olioa bilduko du eta tratamendu baten bitartez zikinkeria guztia kendu ondoren Bionor enpresara eramango dute han biodiesela egiteko.
Ecogras enpresak emango duen zerbitzua doakoa izango da. Urtebete inguru iraungo du esperientziak. Balioko du alderatzeko ze sistema den egokiena: orain arteko bilketa sistema –puntu berdea–, Arrasateko edukiontzi sistema edo Eskoriatzan probatu behar duten sistema.
Lau edukiontzi
Oraindik guztiz zehaztu barik dagoen arren, alkateak esan digu Goiko kalean, Intxaurtxueta-San Pedron, erdialdean eta Dorletan jarriko direla edukiontziak.