Bestalde, Emakumearen egunaren harira otsailaren 24an egindako ohiko osoko bilkuran, udalbatzak aho batez onartu zuen EB-Berdeak taldeak horren harira aurkeztutako mozioa. Horretan, besteak beste, udal ordezkariek adostu zuten Espainian zein Euskal Herrian genero indarkeriak hildakoren bat eragiten duen bakoitzean, udaletxeko balkoian tratu txarren kontrako pankarta jartzea; hain justu ere, puntu lila duen posterra. Modu horretan, hilketa hori salatzeaz gain, jendarte honetako "gaitzaren" kontra Eskoriatzako Udalak duen konpromisoa azaleratu nahi dute.
Azken horren harira, eskura dituen baliabideak erabiliz, berdintasunaren alde lan egitea onartu zuen udalbatzak. Esaterako, emakumeen eta gizonen arteko berdintasunaren irudikapena eta sentsibilizazioa bultzatzen duten programak eta ekimenak garatuko direla eta feminismoa nahiz emakumeen elkartze-mugimendua sustatuko dutela adostu zuen.
Emakume martxa
Gainera, eguaztenean, martxoak 10, egingo den 2010 Euskal Herriko Emakume Martxan parte hartzeko gonbita egin zuten osoko bilkuran. Gogorarazi zuten 2008an Vigon elkartutako mundu osoko emakumeak ostera martxan jarriko direla lau jarduera-eremutan ekiteko: Ongizatea, Emakumeon aurkako Indarkeria, Lana, eta Bakea eta desmilitarizazioa.