Astean egin dute aurkezpena Elizateak taldekoak. Zerrendaburu Leire Okarantzak, Unai Salaberriak, Juan Carlos Belokik eta Javier Villarrek eman zituzten azalpenak.
Oraingoa aurkeztu diren zazpigarren legealdia da, eta orain arte legealdiro Udalean ordezkaritza lortu dute.
Okarantzaren esanetan, auzotarren bizi kalitatea hobetu eta baserritarren nortasunari eustea dira euren helburu nagusienak. "Erdigunetik kanpo bizi garenok hainbat zerbitzu auzoetan bertan behar ditugu. Jende nagusi eta ume asko daude tartean; eta gauza guztietarako mugitu behar izaten dugu", azaldu zuen.Bestalde, azpiegituren lanek eragiten dituzten kalteak saihesteko eta ingurumenaren alde egiteko lanean jarraituko dutela argitu zuten.
Elizateetakoen ordezkarien esanetan, auzotarren eta baserritarren ahotsa Udalean entzun eta aldeko erabakiak har daitezen ezinbestekoa da ordezkariren bat udal gobernuan egotea.