Joan den eguenean egindako ezohiko osoko bilkura urgentean, esandako zerga arautzeko ordenantzaren hasierako onarpena eman zion aho batez udalbatzak. Guztira, sei zinegotzik parte hartu zuten bilkura hartan: Udal Gobernuko Pedro Lasagabasterrek eta Dorleta Lezetak, Alkarbideko Karmelo Lezetak, EAJko Aitor Urrutiak, PSEko Iñaki Pierruguesek eta EB-Berdeak taldeko Juan Luis Merinok.
Proposamena azken talde horrek aurkeztu du. Eskoriatzako Udalean alderdi horrek duen zinegotzi Juan Luis Merinok azaldu digu ordenantza berria indarrean jartzen denean, udalerrian zerbitzua eskaintzen duten telefonia operadoreek 17.800 euro ordaindu beharko dituztela urtero. Eskoriatzan Movistar, Euskaltel Moviles, Vodafone eta Orange enpresa daude. Bakoitzak ordaindu behar duen kopurua neurtzeko Telekomunikazioen merkatuak egindako txostena izan dutela adierazi du. Merinok araudi berria sortzearen beharra ere azpimarratu du: "Telefonia enpresek urte asko eman dituzte herritarretatik probetxua ateratzen; horko zati bat herrira itzul dadin egin dugu ordenantza".
Banketxeei tasa berria
Bestalde, EB-Berdeak taldeak proposatuta, datorren urteko ordenantza fiskalek tasa berria aplikatzea aurreikusten dute. Hain justu ere, domeinu publikoaren erabilera pribatua egiten duten banketxeei eta aurrezki kutxei eta edarien edo jatekoen makina automatikoei urtero 123,6 euro kobratzea. Udalbatzak behin-behineko onarpena eman zien urriaren 28an ordenantza horiei.