Bidelagun izeneko egitasmoa jarri dute martxan berriro

Aurten ere Bidelagun izeneko proiektua jarri dute abian Eskoriatzako ikastetxeek, Leintz Udal Euskaltegiak eta Udalak elkarlanean. Interesa dutenek bihar, egubakoitza, eman behar dute izena seme-alaben ikastetxean edo kultura etxean.

Helburua da euskaraz ez dakiten gurasoak euskararekin harremanetan jartzea eta hizkuntza menderatzen dutenei euskaraz hobeto egiten laguntzea. Modu horretan, gurasoek seme-alaben ikas prozesuan parte hartzeko aukera zabalagoa izango dute.

Bi ikastaro

Horretarako, bi ikastaro gertatu dituzte: euskara menderatzen ez dutenei begira, azarotik maiatzera bitarteko ikastaroa egingo dute. Besteak beste, agurrak, zenbakiak, ohiko esamoldeak eta oinarrizko hiztegia ikasiko dituzte.

Bestalde, euskara dakitenendako ikastaroak azarotik abendura iraungo du. Euskaraz egiterakoan ohiko akatsak zuzentzea eta ahozko jarduna hobetzea lortu nahi dute ikastaro horren bidez.

Kasu bietan, eskolak astean bitan izango dira, ordu eta erdiko saioetan. Egunak eta orduak ikastaroetan izena ematen dutenekin zehaztuko dituzte.

Lehenengo ikastaroaren matrikulak 70 euro balio du; eta bigarrenekoak, 20 euro.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.