Injelan enpresak idatzi du proiektua eta Murias enpresa eraikitzaileak du lanen ardura. Tarte horrek 950 metroko luzera du eta 1.742.510 euroko aurrekontua du. Jakina denez, Aingeru Guarda ermita eta Sorautz bezala ezagutzen den eremua lotuko ditu; GI-627 errepidearen paretik joango da.
Bide-gorriak hiru metroko zabalera edukiko du eta oinezkoak eta bizikletak ibili ahal izango dira. Oinezkoek izango dute lehentasuna eta bizikletek ezin izango dute 20 kilometro ordutik gora hartu. San Juan Kalean lur azpitik pasatuko da bide-gorria.
Eskoriatzatik igarotzen den bide-gorriaren bigarren tartea, bestalde, egiten noiz hasiko den zehazteke dago oraindik. Proiektua Aingeru Guarda-Sorautz tarteko enpresa berak egin du: Injelanek. Eskoriatza Arabako mugarekin lotzen du horrek; 18,8 kilometroko luzera du. Egitasmo hori aurrera eramateak 6.315.861 euro balioko du.