Aurreikuspenak bete ziren, duda barik. Euskal Herriko bazter askotako eta Espainiako hainbat musika zale batu ziren Berri Txarrak taldearen Payola diskoaren aurkezpen ofizialean.
Aitzorrotz kultura elkarteak -antolatzailea- eta Berri Txarrak taldekoek aurkezpena jaia bihurtu zuten; eta lagunak eraman zituzten agertoki gainera.
Deabruak, aspaldiko lagunak
Portugalgo Simbiosis-en metal hardcorea ezin izan genuen entzun, baina Tolosako Deabruak Teilatuetan taldea oso sasoi onean ikusi genuen eta kiroldegia ez zitzaien handi gelditu. Euren ibilbideko errepasoa egin zuten, hardcore melodikoa eta rocka uztartuz; eta opari moduan, Gorka Urbizuren laguntzarekin, Peiremans+ proiektuko kantu bat interpretatu zuten, Weezer gogoratuz.
Profesionaltasuna eta erronkak
00:30ean Lekunberriko hirukotea agertokira igo eta dezibeloak dezente igo ziren, baita zirrara ere. Gogor hasi ziren, euren kantu gogor eta metaleroekin, eta jendea pozarren. Hala, Payola ez, baina aurreko beste hiru diskoetako errepasoa egin zuten; eta halako baten, abestien sonoritatea erabat aldatuta, Payola, Folklore, Gure dekadentziaren onenean, Dortoken mendean, Maravillas eta Placeboren kantu bat eskaini zituzten, gordin, rockero eta 70eko hamarkadako kutsuarekin.
Talde sendoa da, oso profesionala eta haustura barikoa, baina hori ez da berria. Gehigarria da bestelako sonoritatean ere arraina uretan moduan mugitzen dela eta beste erronka bat bete dutela.