Gaurtik barikura bitartean, martxoaren 9tik 13ra, 21:00etatik 06:00ak arte egongo da itxita iparraldeko irteera. Zapatuan, martxoak 14, berriz, goiz osoa emango du horrek itxita.
Txandakako bide mozketak
Horretaz aparte, Gipuzkoako Bide Azpiegituretako Sailetik azaldu dute asteon toki berean txandakako bide mozketak egingo direla; hau da, GI-627 errepideko 29. kilometro puntuan.Jakina denez, San Bernabeko biribilgune horretan GI-627 errepidea eta Eibar eta Gasteiz elkartuko dituen AP-1 autobidearen arteko lotunea jarriko dute. Azpiegituretako Sailak duen lanen programan aurreikusi denez, txandakako bide-lerroen mozketak gaur hasiko dira eta egubakoitzera arte, martxoak 13, iraungo dute; 21:00etatik 06:00etara.
Horretarako, semaforoa jarriko dute. Hori arduratuko da txandak emateaz. Diputaziotik aipatu dutenez, mozketa horien bidez, langileendako eta bidaiariendako segurtasuna zaindu gura dute.
Zapatura arte
Diputazioak azaldu du biribilgunean aglomeratua zabalduko dutela. Obrak ez dira egubakoitzean amaituko. Zapatuan, hilak 14, bideko markak pintatzen eta bazter bionda jartzen ibiliko dira egunean zehar langileak.