Partidu guztian parekatuta ibili ostean, azken bi minututan eskuratu zuten garaipena Eskoriatzako neskek. "Izugarria izan da partidua. Tentsioa, emozioa, presioa... ez da ezer falta izan", adierazi zuen partidu bukaeran Fernando Rasok, taldeko entrenatzaileak.
"Partidu guztian parean ibili ginen talde biak. Laugarren zatia bi puntu azpitik hasi genuen eta partidua amaitzeko lau minutu falta zirela, bost puntutik ari zen Añorga irabazten. Guk gogor jarraitu genuen eta partidua bukatzeko bi minuturen faltan, berdindu egin genuen, 49na", azaldu zuen Rasok. "Defentsan ondo aritu ginen, talde osoak egindako lan onagatik irabazi genuen", jarraitu zuen.
Lauko finala
Zapatuko partidua irabazita, lauko finalean sartu da Eskoriatzako emakumezko saskibaloi taldea. Hil honen bukaeran jokatuko dute fase horretako lehen partidua.