Laguntza horien helburua da eskoriatzarrek enpresa txikiak sortzea herrian bertan. Gainera, atzeraeragina izango dute, hau da, 2009an eta 2010ean jarduera hasi dutenek ere diru mailegua eskatu ahal izango dute baldintzak betez gero. Eta baldintzen artean honakoak daude: Eskoriatzan erroldatua egotea gutxienez urtebetez; Inemen izena emanda egotea enpresa abian jarri aurreko bi hilabeteetan gutxienez; bideragarritasun proiektua aurkeztea –enplegu bat edo gehiago sortuko dituena–; eta Eskoriatzan bertan izatea lan jarduna sortutako enpresak.
5.000 euro arte
Dirulaguntza eskaerok udaletxean aurkeztu behar dira oinarriak Gipuzkoako Aldizkari Ofizialean argitaratu eta 15 eguneko epean. Udal teknikariek baloratuko dituzte eskaintza horiek eta Ogasun Sailak gero proposamena aurkeztuko dio alkatetzari, honek azken erabakia har dezan.
Aurkeztutako guztiek ez daukatela zertan jaso dirulaguntzarik iragarri dute eta gehienez ere 5.000 euro eskuratuko ditu sustatzaile bakoitzak. Laguntza hori erabili beharko dute eraikuntza lanetarako, instalakuntzetarako, altzari eta informatikako ekipoendako… Udalak kontratua sinatuko du laguntza jasoko duenarekin eta adostuta geratuko da proiektuaren helburua, lan egutegia, gastuak justifikatzeko modua eta beste hainbat kontu.