Azken urteotako ohiturei eutsiz, Atxorrotzeko eguna herriko kaleetan hasiko da, 09:00etan, txistulariek egingo duten dianarekin. Ordu erdi geroago, mendira igotzen hasiko dira, eta ordubete inguruko igoeraren ostean gailurrera iritsiko dira.
Fededunek meza izango dute hango baselizan, 11:00etan. Elizkizuna amaitzean, trikitilariek ingurunea alaituko dute, mendizaleek egun horretarako jarritako tabernan egarria eta gosea baretzen duten bitartean. Eguerdi partean, batzuek beheranzko bidea hartzen duten bitartean, beste batzuk Atxorrotzen bazkaltzen geratuko dira. Etxetik ezer igotzen ez dutenek jakin dezatela aurten ere ogitartekoak salduko direla tabernan.
Betiko moduan, arratsaldeko ekimenak Herriko Plazan egingo dituzte. 18:30ean, herritarrek egindako tortillak salduko dira han; bitartean, dantza egiteko aukera egongo da toki berean, herriko txistulariek eskainitako erromerian.
Atxorrotz egunean batzen den dirua Eskoriatzako Atzeratuen Taldera eta Atxorrotx GKEk dituen proiektuei laguntzeko bideratuko da aurten ere.