AP-1 autobidea egiteko lanek eragin zuzena izan zuten Zarimutz, Mazmela eta Apotzaga elizateetan. Izan ere, hiru auzo hauetara joateko bideak erabat hondatu ziren kamioien joan etorriekin. Auzotarren hainbat kexen ondoren, iragan den astean hasi ziren errepideak egokitzen.
Zarimutzeko errepidean azken ukituak ematen ari dira. Hala ere egoera kaxkarrarekin denbora gehiegi eman dutela zehazten digu auzotar batek.
Mazmelako egoera bestelakoa da ordea. Autobidea egiteaz gain AHTko lanak ere egiten ari dira bertan.
Errepidea metro t'erdi zabaldu baldin bada ere, konponketak ez dira elizatera joateko bide guztian egin. Kilometro eta erdiko bidea da elizatera joatekoa, eta errepidea materialak eta makinaria edukitzen duten lekuraino konpondu dute. Mazmelako auzo alkateak bide guztia asfaltatzea eskatzen du.
Hiru elizateetarako bideetan, Apotzagara doanean dago oraindik lan gehien egiteko. Lanak hasita dauden arren, oraindik denbora beharko da erabat bukatu arte.
Aldundiak ia 700.000 euro bideratu ditu Eskoriatzako hiru auzoetarako errepideak konpontzeko. Baina oraindik Aretxabaletako bi auzoetan sortu zituzten kalteak ere bideratu beharra dauzka. Ixurieta eta Galartza auzoetan egin beharreko lanak esleituta daude dagoeneko, eta irailean hasiko dira lanean. Bidegik zuzenduko dituen lan hauetarako 850.000 euro inguru bideratuko dituzte.