Goizez eta arratsaldez elkartuko dira neska-mutikoak (10:00-13:00 eta 15:00-17:00), txikienak izan ezik –goizez bakarrik– eta ekintza mordoa egingo dituzte. Aurreko urteetako egitarauan aldaketa handirik ez egitea erabaki dute Gazteria Zerbitzuko kideek eta udalekuen arduradunek "arrakasta ziurtatuta" dagoela jakinik. Hala, San Fermin eguna izango dute astean, uraren eguna gero, jolasak egingo dituzte eta azken egunean jinkana erraldoia ere bai. Eguraldi onarekin igerilekura joango dira eta txarra eginez gero gaztelekuan edo ludotekan topatuko dute babesa.
Irteerak ere egingo dituzte oso gustuko dituztelako neska-mutikoek, batetik elizateetara taldetan banatuta eta bestetik, Landara joango dira guztiak elkarrekin. Nagusienek, gainera, Alabitara gaua pasatzera joateko asmoa daukate.
Horrez gain kultura etxean dagoen sukaldea erabiliko dute, antolatzaileen esanetan "bai txikiek, bai gazteek oso gustura jarduten dutelako sukalde kontuetan". Hala, ogia eta beste jaki batzuk prestatuko dituzte eta gero bertan jan edo etxera eroan.