Herritarren kezka nagusienetako bat da Santa Marina esparruan egin beharreko etxebizitza tasatuen proiektua. Alkateak jakinarazi zuen abenduaren erditik aurrera izenematea zabalduko dutela. Horretarako, bulego bat zabalduko dute herrian, interesatuei arreta emateko, hain zuzen ere. Bulego horrek hilabete egingo du zabalik eta herritarrek denbora epe hori izango dute apuntatzeko.
Horren harira, Bengoak azaldu zuen azkenean etxebizitza tasatuak 31 izango direla. Eta, are gehiago, lurzoruaren gaineko lege berria baliatuta, Udalaren asmoa dela etxebitzitza horiek betirako tasatuak izatea. Hau da, inoiz ezingo dira merkatu askean saldu.
Autobidea
Gaia aldatuta, autobidearen gainean ere galdetu zioten. Alkateak onartu zuen gai horrekin zenbait kasutan inpotentzia bizi izan duela, Udalak bitartekari lana egiten duelako. Lanei bukaerari dagokionez, Bengoak ez du uste 2008ko urtarrilerako bukatuko dituztenik. 2008ko ekaina da bere ustez data posibleagoa.
Gaztetxea geltoki zaharrera
Gazte batek gaztetxearen gainean galdetu zion. Horren aurrean azaldu zuen udal brigada dagoen lokala, hau da, geltoki zaharra, gaztetxe bihurtu gura dutela. Horren aurretik, baina, udal brigada, biltegia eta bestelako zerbitzuak zentralizatu gura dituzte. Hori guztia egiteko bizpahiru hilabete beharko dituztela jakinarazi zuen.
Hautagaitza, erabaki barik
Besteak beste, Gorritibereak galdetu zion ea 2007ko udal hauteskundeetan aurkeztuko den. Erabaki hori otsailerako hartuko duela jakinarazi zuen, eta badituela arrazoi dezente ezetza esateko. Hala ere, Eskoriatza berria egiteko lanak ere ilusioa pizten diola onartu zuen.