Ikastaroak
Orain hasi berri dira ikasturte osorako ikastaroarekin. Astelehenero eta eguaztenero emango dituzte eskolak pilotalekuko gimnasioan.
- 19:00etatik 20:00etara bitartean, 16 urtetik beherakoendako.
- 20:00etatik 21:30era, berriz, helduendako.
Horren izenematea zabalik dago. Interesatuak Senzala Euskadi taldearekin harremanetan jar daitezke. Horretarako, hiru bide dituzte: www.senzalaeuskadicapoeira.info webgunea, senzalaeuskadi@hotmail.com posta helbidea edo 652 77 22 95 telefono zenbakia, hain zuzen ere.
Asteburuan, ikuskizunak eta ikastaroak
Horren aurretik, egubakoitzean, hilak 15, Senzala Euskadi taldeko lagunek eta Rio de Janeirotik (Brasil) etorritako bi irakaslek, Pedrok eta Juliok, erakustaldia egingo dute herriko plazan. Ekitaldi hori 19:30ean izango da. "Horren helburua da capoeira herritarrei gerturatzea eta herrian giro apur bat ere sortzea, zerbait desberdina eskaintzea", azaldu zigun Senzala Euskadi elkarteko presidente Igor Ezpeletak.
Egubakoitzeko erakustaldia ez da izango asteburuko aukera bakarra eskoriatzarrek eta beste herrietako lagunek capoeira bertatik bertara ezagutzeko izango dutena. Zapatuan eta domekan aipatutako Brasilgo irakasleek ikastaro berezia egingo dute pilotalekuan, 11:00etatik 14:00etara bitartean. Asteburuko ikastaroko ikasleak bi taldetan banatuko dituzte: ezer ez dakitenak, eta oinarrizkoa dagoeneko ikasi dutenak. Umeek 25 euro ordaindu beharko dituzte, ikasle eta langabetuek 30 euro, eta langileek 35 euro. "Ikastaroa herritar guztiei zuzenduta dago, nahiz eta bakoitzak bere erritmoa hartu".