Iurrek 12 urte daramatza Mexikora bidaiatzen eta han ikusitakoak ematen diola indarra horrelako ekitaldiak antolatzeko adierazi zigun. "Baztertuen alde egitea da helburua, baztertu mota guztien alde, eta mundu justuago baten aldeko kontzientzia piztu nahi dugu. Bestalde, Eskoriatzako zein bailarako herritarrak batzea ere ondo dago". Kontzientziazio horren harira, hitzaldiak, film emanaldiak eta hainbat ikuskizun izan dira astelehenean hasi eta zapatura arte tabernetan eta kultura etxean. "Adin guztientzako ekitaldiak egon dira eta informazio interesgarri asko eskaini dugu, gustura gaude ".
Mexikar menua gustuko
Zapatuko herri bazkarian 100 lagun inguru elkartu ziren eta oso gustuko izan zuten mexikar menua. Amuska taldeko kideek prestatu zuten janaria eta hainbat herritarrek egin zuten zerbitzari lana. Izan ere, Mexikoko lagun bat etorri zen Eskoriatzara eta hark erakutsitako errezetak prestatu zituzten: tinga, alanbrea, frijoleak, arroza, guakamolea...