10:30ean eman zioten hasiera azokari. Han, baserritar eta artisauen postuez gain, Arizmendi Ikastolako ikasleek jarritako postuak ere bazeuden. Baita zenbait elkartetako postuak ere. Eurek egindako bitxiak edota bonboiak saltzen aritu ziren ikasleak.
Baserriko elikagaiak, herri askotatik etorritako artisauen lanak, animaliak eta beste hainbat bitxikeria ikusteko aukera izan zuten han batutakoek.
Txorimalo lehiaketa eta tailerrak
Urteroko txorimaloen lehiaketak aurten ere harrera ona izan du. Denera 25 txorimalo aurkeztu zituzten lehiaketara Eskoriatzako gaztetxoek.
Tailerrak ere izan ziren, gaztetxoenendako. Herriko plazan, pilotak egiten edota aurpegiak margotzen aritu ziren. Leku berean txahala erre zuten eta iluntze aldera dastatzeko aukera izan zen.
Azokaren sari ematea
Eguerdian, Arizmendi Ikastola aurrean euskal dantzak egin zituzten gaztetxoek eta ondoren sari banaketa hasi zuten. Baserritarren saria Apotzagako baserritarrendako izan zen, Mertxe Alberdi buru zutela. Artisauen saria Jabier Etxebarrieta Patas-ek jaso zuen eta herritik kanpoko postu politenaren saria, berriz, Roman Aduriz oiartzuarrak eraman zuen.
Ondoren, herri bazkaria egin zuten pilotalekuan.