Orain arte Arrasate, Aretxabaleta, Eskoriatza eta Aramaion zeuden elkarteak batuko ditu eta Bergarakoak ere esku hartzeko gertu azaldu dira. Bere izaera kritikoa izango da, kritikaren bidez gauzak hobetzeko xedea izango baitu.
Webgunea ardatz
Lehen urratsa webgunea sortzen hastea izan da: www.onbide.org. Azpiegitura erraldoien nondik norakoak eta eragin ditzaketen arazoen gainekoak azalduko dira bertan.
Elkartekideek aditzera eman dutenez, webgune independentea izango da, zentsurarik egon ez dadin.
Lurjabe eta kaltetuei zuzenduta
Lurjabeei eta kaltetu orori zuzendutako ataria izango da. Zein atal izango dituen zehazteke dago oraindik, baina asmoa da informazio kartografikoa, iritziak eta beste herrialde batzuetako adibideak, alegazioen edota ekintzen tarteak jasotzea.
Elkartekideek garbi utzi nahi izan dute ez daudela autobidearen kontra.
Jardunaldiak, hitzaldiak, erakusketak eta bestelako ekintzak ere antolatuko dituzte. Ostiral honetakoa izango da lehena: Eskoriatzako pilotalekuan eskuzko pilota jaialdia izango da 21:30ean hasita. "Autopista hobe baten alde, administrazioa bete zure hitza" izango da leloa.