Azkoaga tabako-denda zegoen eraikinean azaroa ezkero dabiltza lanak egiten. Hasieran, langileak eraikinaren barrua husten ibili ziren, baina gerora konturatu ziren eraikinaren atzeko aldeko estruktura aldatzea komeni zela, zaharkituta zegoelako. Horregatik, joan den egubakoitzean eta oraingo astean, hondeatzeko makina bat ibili da eraikinaren atzealdea botatzen. Aurrealdea, berriz, oraindik ez dute ukituko, ondo dago-eta.
Estruktura bera egingo dute
Azkoaga familiakoen asmoa da eraikinak estruktura bera izatea. Aurrealdea dagoenetan geldituko da, eta atzealdea lehengoaren antzekoa egingo dute.
Valentin Azkoagak ez du zehaztu gura hotela noizko egongo den bukatuta. "Estruktura eta estaldura berria egiten dugunean berba egingo dugu daten gainean, baina ordura arte ez dago jakiterik", aitortu zuen.
Azkoaga eneak 14 logela
Bestela, proiektua ez da aldatu. Azkoaga Enea hotelak 14 logela izango ditu, eta, horrez gain, beheko solairuan jatetxe txiki bat eta kafetegia jarriko dituzte, eta biek hala biek atzeko lorategira irteera izango dute.
Azkoagak badaki aste barruko bezero gehienak enpresetako langileak izango direla. Hala ere, asteburuetarako eskaintza pertsonalizatuagoa egiteko asmoa dauka, bikoteak eta familiak Eskoriatzara erakartzeko.