MUko Hizkuntza Saileko Arantza Ozaetak esan digunez, Javier Revertek eman zien jardunaldiok bekatuen gainean antolatzeko ideia: Iaz, Literatura eta bidaia zen goiburua, eta Javier Reverteri etortzeko gonbidapena egin genion. Bidaien gainean berba egiteaz nekatuta zegoela eta bekatuez berba egiteko gogoa zuela esan zigun. Azkenean ez dugu ekartzerik izan, baina Atxagak esaten duen moduan ideia fotokopiatu diogu, behinik behin.
Zazpi bekatu
Gai horren harira, izen handiko idazleak etorriko dira Eskoriatzako fakultatera. Bekatuak eta idazleak lotzeko orduan ez da arazorik egon: Kirmen Uribek inbidia aukeratu zuen eta gainerakoak nik proposatu nizkien: Hasier Etxeberriari sabelkeria (gula), sukaldaritzako gaiak landu izan dituelako askotan; Unai Elorriagari handikeria, bere pertsonaiak umilak eta apalak direlako, ikusezinak ia, justu handikeriaren kontrakoak; eta Harkaitz Canori nagikeria, jostalaria delako, umorearekin primeran moldatzen delako, diosku Ozaetak. Santo Tomas Aquinok zerrendatutako zazpi bekatuetatik, hira eta zekenkeria kanpo geratu dira, haragikeria mahai-inguruan jorratuko baitute.
Mahai-ingurua eguenean Arrasaten
Hain zuzen, Literatura Asteari hasiera emateko, eguenean, hilaren 17an, mahai-ingurua egingo dute Arrasateko Monterron jauregian, 19:00etan. Bekatua eta haragikeria izenburupean, Aizpea Goenagak, Iñigo Lamarcak eta Jabier Muguruzak hartuko dute parte eta Ana Urkiza arituko da moderatzaile lanetan.
Programa
Gainerako hitzaldiak HUHEZIko fakultatean izango dira, Eskoriatzan:
Martxoak 20, astelehena Kirmen Uribe / Inbidia / 19:00
Martxoak 21, martitzena Hasier Etxeberria / Sabelkeria / 19:00
Martxoak 22, eguaztena Unai Elorriaga / Handikeria / 11:30
Martxoak 23, eguena Harkaitz Cano / Nagikeria / 19:00