Udalak jakin badaki aspalditik udalerriko hainbat elizateetan telebista ondo ikusi ahal izateko kableatu pribatu edo kolektiboak egin behar izan dituztela.
Udalak behingoz konponbidea eman gura izan dio arazo horri, eta Telecom Novatecno enpresari adjudikatu dizkio lan horiek.
Horren arabera, enpresa horrek hondeaketa egin, korrontea eraman eta instalazioa jarri beharko du. Horretarako, 75.000 euroko aurrekontua dauka.
Errepikagailua Aitxorrotx aldean
Udalak jakinarazi digunez, errepikagailua Leintz Gatzagatik Zarimutz aldera jarriko dute, Atxorrotx menditik gertu. Hain zuzen ere, Gorosarri baserriaren gainetik. Udaleko ordezkarien esanetan, leku oso aproposa da. "Handik ikuspegi ona dago seinalea hartzeko, eta elizateetara bidaltzeko. Berez seinalea Oiz menditik hartuko dugu".
Lanak martxorarte
Lanak Eskoriatzako Udalak eramango dituen arren, argindarra Leintz Gatzagako Artabilla baserritik hartuko dute, hori da-eta gertuen aurkitu duten aukera.
Lanok urtarrilean hasi zituzten eta Udalaren asmoa da bi hilabete barru, martxo aldera, bukatuta egotea.
Horrez gain, jakinarazi dute telebista seinalea emateaz gain, Udalak enpresa horri eskatu diola banda zabala ere abiarazteko. Horren bitartez, hiru elizateetan bizi diren lagunek Internet erabiltzeko aukera ere izan dezaten.