Aitzorrotzeko erromeria tradizio handiko jaia da Eskoriatzan, eta domekan ere, zubia izan arren, herritar asko animatu zen goizean goiz egindako hitzordura. 09:30ean herriko plazatik atera ziren Aitzorrotzera eta meza ordurako igo ziren gehien-gehienak. Atzo, gainera, meza Genaro Lekuona Arrasateko parroko eta artzapezak egin zuen Aitzorrotzen 11:30ean.
Bazkaririk ez baina taberna bai
Aitzorrotzera igoera goizeko 9etan iragarri zuen txistularien dianak eta ordurako Udalak jarritako autoak pare bat buelta emanak zituen Aitzorrotzeko taberna gertu izateko lehenengo erromesak igo orduko. Egun beroa izan zenez, tabernan lan asko izan zuten. Bazkaria ez zen egin, ez behintzat antolatzaileek deituta, aurreko urtean izandako erantzun eskasak eraginda. Hala ere, asko izan ziren han goian geratzea erabaki zutenak bazkalostera arte, erromerian egiteko beherako bidea.
Xafre eta Zaharra trikitilariek alaitu zuten goiza eta arratsaldeko 5etan beherako bidean ziren. 18:30ean berbenari ekin zion Kaixo taldeak eta hori baino lehen herritarrek prestatutako patata tortillak dastatzeko aukera izan zuen jendeak.
Atxorrotxi laguntzeko
Batutako dirua Atxorrotx GKEri laguntzeko batu zuten, buruko gaixotasunak dituzten pertsonei laguntzeko.