Otsailaren 8 eta 9an Zubillagako Hiltegiaren eta Debagoieneko harakin eta ganaduzaleen etorkizunari buruzko jardunaldiak egingo dituzte Eskoriatzako Ibarraundi jauregian. Herritarrei informazioa ematea da helburua. Eskoriatzako Udalak bere garaian itxieraren kontrako jarrera hartu zuen, baina herritarrek aldeko eta kontrako iritzien berri izan dezaten antolatu dituzte jardunaldiak.
18:00etan hasiko dira hitzaldiak. Hasteko, hizlari bakoitzak hamabost minutuko hitzalditxoa egingo du. Ondoren, mahai-ingurua egingo dute, euren artean berba eginez eta entzuleen galderei erantzunez.
Jende ugarik hartuko du parte bi egunetan. Martitzenean, besteak beste, hiltegiko gerente German Berezibar, EHNE sindikatuko Eneko Karrera eta Juan Carlos Bengoa alkateak hitz egingo dute. Eguaztenean berriz, Gipuzkoako Harakinen Federazioko Jon Leturia, Arantza Igartua harakina eta Eneko Egibar albaitaria izango dira hizlariak, beste batzuen artean.