Urdelardero eguna duela 26 urte hasi zen ospatzen. Inauteriak gainean ditugula adierazteko balio digun ospakizuna da. Egun hori ospatzen hasi zirenean, herriko gazteak baserritar jantzita etxez etxe joaten ziren abesten. Trukean, jendeak txerrikia ematen zien kantari gazteei, eta eskuetan eramaten zituzten ziri edo makiletan sartzen zuten jana.
Egun horrek badu bere esanahia. Lardero hitza latinetik dator, eta koipea esan gura du euskaraz. Egun horretan txerrikia zergatik eskatzen zen jakiteko, Aratusteen ondorengo datari begiratu behar zaio. Kristautasunak era guztietako penitentzi, sakrifizio, zigor eta barauz osatutako denbora-tartea ezarri zuen, Garizuma, alegia. Horren aurretik, oreka bilatu guran, Inauteriak ospatzen hasi ziren, Garizumaren esanahiaren aurkako ekintzez osatzen zirenak. Horrela, ulergarri egiten da haurrak txerriki eske irtetea. Hala ere, gauzak aldatuz joan dira, eta gaur egun, txerrikia barik, gozokiak jasotzen dituzte trukean herriko gazteek.
Aurten ere ospatu da
Aurtengo Urdelardero eguna herriko ikastetxeetako haurren kalejira batekin hasi zen. Ekitaldia amaitzerakoan, eguerdi aldera, plazaraino joan eta tripa betetzeko aukera izan zuten hara gerturatutakoek, txistorra jan zuten-eta.
Arratsaldez ere umeek izan zuten zer egin. Azkona taldearen eskutik umeentzako jaialdia prestatu zuten antolatzaileek, eta primeran pasa zuten gaztetxoek.