Aspaldi heldu ziren Oñatiko danborrak eta kupelak Elgetara, eta haiekin egin dituzte ia entsegu guztiak aurten. "Nabari da bigarren urtea dugula. Iaz baino hobeto jotzen ditugu kantuak aurten", azaldu du Domingo Iturbe Fest Jai Batzordeko Uxue Larreak.
Urriaren 23an eta 24an ospatuko dituzte Domingo Iturbe kaleko jaiak, eta danborrada izango da ekitaldi nagusietako bat. "Espero dugu iaz baino eguraldi hobea izatea. Gure asmoa da, aurten bai, eskolatik abiatu eta Domingo Iturbe kaleko goiko biribilgunerainoko ibilbidea egitea danborrekin".
Txapelketak eta bazkaria
Zabalik daude bakailao zein pintxo lehiaketarako izen emateak, Janelan. Zapatuko bazkarirako txartelak ere han daude salgai. Prezioa 17 euro da, eta aukera beganoa ere egongo dela jakinarazi du Larreak. Iaz, 132 lagun elkartu ziren bazkaltzeko.
Ainhoa Sanchezen trikiti doinuek girotuko dute bazkalostea. Ondoren, irrintzi lehiaketa egingo dute, eta hori amaitutakoan abiatuko da danborrada. Antolatzaileek esan dute ohikoa baino entsegu gehiago egingo dituztela datorren astean. Izenbarekuak txarangak eta Ufal erromeria taldeak osatuko dute egitaraua.