Ekintzak 16:30ean hasiko dira, eta jai batzordeak jakinarazi du 130 bat lagun elkartuko direla afaltzeko. 20:45ean egingo dute umeen afari-merienda eta 21:30ean, auzo-afaria. Aurretik, bizikleta-buelta Domingo Iturbera (16:30), karakol lasterketa eta igel-toka zein mahai-futbol txapelketak (17:00), entzierroa eta buruhandiak gaztetxoendako (18:00), disko-festa Amaia DJrekin (18:30) eta dantza-showa (19:00) izango dituzte.
Herriko umeen koreografiekin egingo dute, aurten ere, dantza-showa. Afalosteko erromeria, urtero moduan, Gauargi taldeak egingo du.
Denetariko kantuak
Gauargi taldeak egingo du erromeria. "Betiko kantuak abestuko ditugu, eta baita gaur egun modan dauden beste kantu batzuk ere. Urtero moduan, gure helburua izango da jendea dantzan jartzea eta gurekin batera ondo pasatzea. Gogoz gaude, aurten ere, Beheko kalera joateko", azaldu du Gauargiko abeslari Amaia Txintxurretak.