Maiatzaren 22an amaitu zen izena emateko epea, eta Udalak jakinarazi du 99 ume daudela apuntatuta udaleku zerbitzurako.
2-14 urte arteko umeendako zerbitzua da, eta aurten ere oporraldietako lehenengo bost asteetan egongo da erabilgarri. Astelehenetik barikura egongo da zabalik, 09:00etatik 13:00etara. Helburuetako bat da kontziliazio premia duten familiei irtenbide bat eskaintzea, eta umeentzako aisialdi-gune hezitzaile eta euskalduna irekitzea.
Gaia, animaliak
Gozamena eta dibertsioa eskaini nahi ditu Udalak udaleku zerbitzuan. Hezkuntza zinegotzi Ikuska Lizarraldek azaldu du euskara eta errespetua bultzatuko dituztela, eta nabarmendu du "udako aisialdia kanpo espazioak konkistatzeko unea" dela. Herri Hezitzailea sareko Umeen Batzordearen bidez hainbat irizpide umeek markatu dituzte. Gaia, esaterako: animaliak. Horrekin batera, irteera nagusia, igerilekuetara.