Astelehenean, maiatzak 4, amaituko da Elgetako Udalak herriko elkarteei zuzendutako dirulaguntzetarako eskaera egiteko epea.
Udalak iaz egin zuen deialdia lehen aldiz. Bigarren edizioan hiru aldaketa nabarmendu ditu Euskara zinegotzi Maialen Arnedok. "Iaz, balorazio batzarra egin genuen elkarteekin, eta jasotako ekarpenak txertatzen saiatu gara", esan du. Nobedadeetako bi dira eskaerak egiteko epea luzatzea –aurten hogei lanegunekoa– eta errepikakorra den eta aldatzen ez den dokumentazioa urtero aurkeztu beharrik ez izatea –IFZ zenbakia, elkartearen dokumentazioa...–.
Bestetik, aurten partida osoa banatuko dela esan du Arnedok. "Dirulaguntzak eskatzeko, elkarteek ekintza planak aurkezten dituzte, baina batzuetan ez dira ekintza guztiak gauzatzen eta partida osoa banatu barik gelditzen da. Bada, aurten diru hori birbanatu egingo da, partida erabat bideratzeko".