Ekitaldian, “Elgeta Palestinarekin Elgetako bonbardaketaren urteurrenean” izenburua duen testua irakurri dute. Adierazpenean, 1937ko bonbardaketan Elgetak bizi izan zuen suntsiketa ekarri dute gogora, eta lotura egin dute gaur egungo gatazkekin. "Faxismo inperialistak Libanon eta Iranen botatako bonbak, ozen entzuten dira Euskal Herrian. Ez ordea, Palestinan oraindik pairatzen duten genozidioa: Etengabeko heriotzak, bai kaleetan bai kartzelatan ere".
Besteak beste, Palestinako egoera izan dute hizpide, eta gerraren ondorioak salatu dituzte, "gosetea, botiken falta, edateko uraren eza, ospitaleak suntsituta, familiak apurtuta... Herri oso baten suntsiketa". Era berean, herri zibilen aurkako erasoak gaitzetsi dituzte.
Amaieran, hainbat aldarrikapen egin dituzte: "Guk, gure herria zelan suntsitu zuten ondo dakigu. Guk ere, gizarte zibilaren kontrako eraso indiskriminatuak pairatu genituen. Eta honengatik aldarrikatu nahi dugu: Herri hau, gerra inperialistaren kontra dagoela. Herri hau, heriotzaren negozioaren kontra dagoela. Herri hau, genozidioaren kontra dagoela. Gora herri honen askatasunaren alde borrokatu zuten erresistenteak! Gora palestinar erresistentzia! Gora Herri libreak!
Memoria historikoa gazteentzat
Urteurrenaren harira, bestelako ekimenak ere antolatu dituzte herrian. Besteak beste, memoria historikoa gaztetxoei gerturatzeko ikus-entzunezko bat aurkeztuko dute barikuan, eta aurrerantzean Intxortako ibilbide tematikoa bisitatzen duten ikasleentzat ere erabilgarri izango da.