Telebista-plato izan zen eguaztenean kafe antzokia. Aitziber Gradosek aurkeztutako umorezko saioko bi atal grabatu zituen Hiru Damatxo ekoiztetxeak, Primeran plataformarako. Lehenengoa domeka honetan emitituko dute, eta jarraian joango dira hurrengoak.
Umorezko saioa da Linbo eta gustura egin zuten barre Espaloian publiko lanak egitera animatu zirenek. Badira, lehen saiora joan eta bigarrenera ere gelditu zirenak.
Gonbidatu eta kolaboratzaile sarea dute Linbo saioan eta hainbat aurpegi ezagun elkartu ziren eguaztenean Elgetan. Bestetik, gidoilari lanetan dihardu Asier Kortabarria Moto bergararrak. Gidoia idazteaz batera, grabaketa hasi aurretik publikoari harrera egiteaz eta saioan zelan jokatu azaltzeaz arduratzen da Beñat Iturbe gidoilari eta umoregilearekin batera. Beste ikuskizun bat, bere horretan.
Beste bi grabaketa egun daude iragarrita. Apirilaren 8an eta 22an beste bina saio grabatuko dituzte Elgetan, 17:30ean eta 19:15ean. Ikustera joateko, hemen eman behar da izena.