Martxoaren 25ean eta apirilaren 8an eta 22an Linbo saioaren sei atal grabatuko dituzte antzokian. Umorezko elkarrizketa saioa da, Aitziber Gradosek aurkezten du eta Hiru Damatxok ekoizten du, EITBrendako. Gidoilarien artean da Asier Kortabarria bergararra. "Telebistako plato bihurtuko dugu Espaloia. 20-30 bat laguneko lantaldea gara, eta grabaketak izango dira 17:30ean eta 19:30ean. Primeran plataforman emitituko dira saioak", azaldu du.
Publikoarekin egiten dira Linbo saioak. "Nahi duen orok du etortzeko aukera. Doakoa da. Saioak grabatzeaz gain, helburua da ikuskizun bat eskaintzea. Orain arte, adin guztietako publikoa etorri da".
Lehen grabaketak
Martxoaren 25ean bigarren denboraldiko bosgarren eta seigarren atalak grabatuko dituzte. Gonbidatuen artean izango dira Bengo musikaria, Edurne Azkarate eta Intza Alkain aktoreak, Iban Garcia eduki-sortzailea, Oihana Fernandez de Barrena aizkolaria... "Euskaldunok badugu umorea eta badugu umorerako joera. Nahi duguna da etortzen den publikoak ondo pasatzea, harritzea eta ezusteko bat edo beste hartzea".