San Sebastian eguna dela eta, eskolako danborradak bi emanaldi egingo ditu: 11:45ean parrokiako arkupean eta 15:30ean frontoi zaharrean –eguraldi txarra bada, HHko patioan–. Haur Hezkuntzako 3, 4 eta 5 urtekoek eta Lehen Hezkuntzako 6. mailako ikasleek hartuko dute parte danborradan. Iaz bezala, eta San Sebastian eguna aste barruan izanda, lehen saioa San Sebastian Kofradiako Nobleen ekitaldiari hasiera eman aurretik izango da. Kofradiako kide Oier Villak adierazi du "gustu handiz" hartzen dutela haurren danborrada, "tartean egoten direlako ilobak eta ezagunak diren haur asko". Bigarren saioa familiei begira egindakoa izango da.
Nobleen ekitaldia
Aurten ere 23 lagun elkartuko dira Elgetan San Sebastian egunean: Uberako hiru kofrade, Angiozarko lau eta Elgetako hamasei izango dira. Danborradaren ostean, meza entzun –aurten Imanol Prieto abade berriak esango du– eta sakristiako ekitaldia egingo dituzte. Ekitaldiaren ostean, elkarrekin bazkalduko dute, Lola jatetxean.
Errege Katolikoen aginduz sortu zen, 1482an, Nobleen San Sebastian Kofradia Elgetan, lur-jabeei euren lurrak defen- datzeko armak erabiltzeko bai- mena emateko. Egun, hutsik egin gabe, Uberako, Angiozarko eta Elgetako kofradeek elkarre- kin egiten dute ekitaldia urtero.