Elgetako Korrika batzordea sortzeko lehen batzarra martitzenerako deitu dute. Herriko eragileak eta erakundeetako ordezkariak gonbidatu dituzte parte-hartzera; baita herritarrak ere. "Korrika egitasmo erraldoia da. Hau ez litzateke posible izango Euskal Herrian dagoen sarea martxan ez balego. Batzordeak herrika antolatzen dira eta edonork hartu dezake parte, herritar zein eragileak. Aurten dei berezia egiten dute Gazte Euskaltzaleen Sareko kideek, gazteek ere parte hartu dezaten eta erreleboa modu naturalean eman dadin", azaldu du Korrikako koordinatzaile Ane Elordik.
Izendatuta dago Elgetako batzordeko dinamizatzailea: Uxue Igarza eibartarra izango da. Batzordean parte hartzeko dei egin die herriko eragile eta norbanakoei.